مذكرات مهندس فاشل

مذكرات مهندس فاشل 27

مايو 17, 2008

05:08 م

(27) العلم نوور !

في كل الأحداث و الخروجات و الضحك بتاع تانيه مدني لقيت نفسي حبيت قسم الهندسه المدنيه جداً

العمليه إحلوت و بدأنا ناخد تحليل إنشائي جامد ، خرسانه دسمه جداً ، ري و هيدروليك ، مساحه و أجهزه لذيذه جداً ، الحقيقه فروع كلها مرتبطه بالحياه و تحس بالتطبيق و بفايدتها المباشره ونا احب كده قوي

يعني احب افهم ليه بعمل دي ، ليه بذاكر دي ، ليه بحل المشكله دي ، فايده الحاجه دي إيه..........و هكذا

بالفعل قسم المدني ماخيبش ظني و لقيت نفسي سخنت عليه و بذاكر بنفس مفتوحه بدل الصمّ بتاع المدرسه

زياده علي كده البال رايق بلا حب بلا نيله ، و السهرات و الخروجات و اللعب مع إصحابي شغّال علي ودنه

قلت لازم بأه أجيب جيد جداً.........اه..........ليه لأ ؟؟

قلت للواد حسام صديقي الماكينه الألمانيه "بتعمل ايه عشان تجيب جيد جداً يا حسام؟"......قالي "ذاكر كويس يا حازم و نام بدري و بطّل صرمحه "

طب حلو قوي !

ذاكرت و الله بنفس و بإقبال عل الدنيا كده ، و جت إمتحانات نص السنه

حليت حلو ...حلو حلو يعني.....صحيح بعض الTRICKS بتاعت الإمتيازات عدّت عليا لكن حسام طمنّي و قالي "دي بس قله خبره يا حزوم و تعوض في إمتحانات آخر السنه"

يعني إيه خبره؟؟............"هيا الدراسه كمان فيها خبره يا عم حسام ؟؟"

قالي "آه طبعا....أنا نفسي ممكن مجبش trick مسأله بالفهم لكن من كتر خبره الحل و الإمتحانات ممكن أفهم إزاي المسأله دي تتحل !"

كده !.......طب ماشي.............أما نشوف !

إستمرت السنه بين حسن و حشيش و حسين و بولات الإستميشن و سامر و خروجات الثانيه صباحاً و خروجات حريم كريم قصدي حريم سامح

و بعض السهرات الأخري ذات اللون الأزرق و المياه الأصفره مع قريبي ونا خالي القلب سعيد ووقت المذاكره أحب المذاكره و أحب العالم الجديد بتاع الخرسانه و التحليل الإنشائي و المساحه

في ذات الوقت كان حسن ذو العقليه الجبّاره و اللعبي جداً متأخر عن حسام و عني بالمذاكره ، أما حسين و حشيش فكانوا مواظبين إلي حد كبير و خاصه إنهم ناس ملهمش في الهلس ، يعني خروجات بريئه و دمتم !

الحقيقه أكتر حاجه نغصّت عليا في تانيه مدني هيا التعامل مع سامر صديق عمري و زميل ديسك تانيه إعدادي !

ساقط الواد في أولي مدني لأول مره بالتاريخ ............طب أتعامل معاه إزاي ده؟؟

قعدت مره مع سامح صديقي زير النساء و بما أنه سقّيط قديم (في الثانويه) قولتله :

"بقولك يا موحه...بدون إحراج يعني...كنت تحب الناس تعاملك إزاي ونتا بتعيد الثانويه ؟"

سامح : ما تتلم يا زفت إنتا !

أنا : لا و الله جد متزعلش مني يا عبيط، ، أصل صراحه شايف سامر واخد مني جنب كده ونتا عارف دا حبيب قلبي

سامح : آآآه.........لا مفيش طبعاً مكنتش أحب حد يكلمني عن الموضوع دا

أنا : ماشي إيه كمان ؟

سامح : ولا يديني نصايح بأه و يعملي فيها أبو العُرييف بروح.....(كلمه مش لذيذه)

أنا : حبيبي سموحه ، و إيه كمان ؟

سامح :بإختصار كده ميجبش سيره و يتعامل معايا عادي ب..........(كلمه مش لذيذه خااااااااااالص)

أنا : طب تفتكر أصور لسامر ورق عن أولي مدني ولا أعرض عليه حسام يشرح له........
سامح (مُقاطعاً) : أفتكر تتنيل و تقوم تتهبب تلبس عشان الحريم زمانها واقفه ف الشارع !

..........................(دقيقه كنت لابس و جاهز) !!

تعليق بدون عنوان

مايو 17, 2008 ، 06:51 م .. من قبل masryeen

الأخ حازم
انقل اليك هنا تعليقك علي مدونتى .. لعل من يقرأون لك يعرفون أن لست فاشلا فقط في الهندسة كما تكتب مذكراتك هنا .. ولكنك يبدو أن فشلك قد أثر علي تفكيرك بالكامل .. و لا يرقي تعليقك الي مستوي عامل
نحن نمارس الهندسة .. و نهرف أنها فن و ذوق قبل أى شئ .. ولا ما تعرفش كده
عموما أعذرك لأنك كما تكتب عن نفسك فاشل
................................................
هذا ردك.. إقرأه كده
......................................
هوا دا شعر ولا بنج بونج؟؟
2008/05/17 ، 04:02 م .. من قبل lastdinner .. تعديل .. حذف

ايه يا مصريين الكلام دا ؟؟
ونا اللي فاكر نفسي مابفمش في الشعر....طب خد دي تخليلك القصيده ولعه
انا كنت بحب واحد ..دلوقتي بحب سته !
انتا بتحب رقاصه ولا ايه؟؟
دي رقاصه و مستعجله كمان !

أخوك حازم
>>>>>>>>>>>>>>>>>>>>>>>>>>>>>>>
و هذا ردي عليك
...................................
عيب يا حازم
2008/05/17 ، 05:42 م .. من قبل masryeen .. تعديل .. حذف

الأخ حازم
يبدو أنك لا تفهم في الذوق و ليس الشعر
لقد تجاوزت في تعليقك حدود الأدب و اللياقة
و ليست هذه خفة دم بل سوء فهم منك
رجاء ان لم يعجبك ما تقرأ فلا تعلق
لا أحتاج تعليقك هذا
احترم نفسك يحترمك الأخرون
عيب

اعطني روحك00

مايو 18, 2008 ، 03:21 م .. من قبل rodhawp

ربنا يهدي00

شكرا يا مصريين !

مايو 20, 2008 ، 08:45 م .. من قبل lastdinner

سهل قوي أتنرفز زيك و أخسرك لأني بسهوله ممكن أقولك دا رأيي و مادام إرتضيت تنشر أعمالك لازم تقبل المدح و لازم تقبل القدح ، ممكن قوي تفتح مدوناتي و تشوف إني بقبل الذمّ و عمري ما حذفت تعليق لأن النقد له شقين و ليس شق واحد و من الفشل و الذمّ يتولد النجاح و التطور
لكن سيبك من كل دا ، أنا برضه بعتز بيك و بمواظبتك علي قراءه أعمالي ، و إن كنت يا سيدي مش محتاج نقدي أنا محتاج نقدك لأني بحب أشوف نفسي في مرآه حقيقيه زي ما الناس شايفاني مش زي منا عايز أشوف نفسي
و يهمني تفهم و تميز إني حتي في تعليقي الساخر كنت بعلق على قصيدتك مش بجرح فيك شخصياً زي ماعملت إنتا
عموماً لو زعلت مني أنا بعتذرلك أمام كل الزملا و أوعدك مش هعلق عليك تاني حلو أو وحش عشان محبش أكون منافق أكتب الحلو بس
أخوك حازم
ملحوظه : هتلاقي الكلام دا تحت نفس مدونتك كمان عشان إعتذاري يكون علني

أرسل تعليق

من:

*

عضو مسجل: [ دخول / التسجيل ]

* عنوان الموقع:

* البريد الإلكتروني:
الموضوع:

* النص:

* الرمز: