مذكرات مهندس فاشل

مذكرات مهندس فاشل 26

مايو 15, 2008

08:51 م

(26) حسن ..........رجل العام !

لو هفتكر حد جامد قوي في تانيه مدني .......يبقي حسن !

حسن صديقي ذو العقليه الجبّاره الدراسيه و الوسيم شكلاً و الدبلوماسي موضوعاً و ذو الأعصاب الجليديه و السُهنّ شخصياً .........و المُعذّب في الحب وقتها !

سمعت من حسام إن حسن عنده girl friend في الخباثه (كعاده حسن) .....غزال إسكندراني و مبيتكلمش عليها أبداً مع أي حد ، قلت في نفسي "يالا.......كلنا في الحب عباسيه " علي رأي أخونا عبد الوارث عسر في "شباب إمرأه" !

و بما إني كنت أعيش ساعتها "شباب رجل" لأني تخلصت من حب حنان في اليوم الدراماتيكي إللي فات دا و إللي لحد دلوقتي مش عارف أسبابه بالظبط إيه ، قلت يا واد يا حازم شوف حكايه الجدع دا إيه !

بالفعل نظراتنا أنا و حسن تلاقت كتير في مواقف كتير....نظرات تدل علي الفهم لما يحدث حولنا ، و بالرغم إني معنديش ذكاء حسن الدراسي و العلمي الحاد لكني كنت أتميز بفهم الشخصيات و المواقف بسهوله و موهبه صغيره طبيعيه حباني بيها الله .

عندي كمان حاجه كده غريبه شويه ، إني ممكن "أفصل" أي حد من اي موقف جامد جداً بطرافه و سرعه بديهه مش عارف بتيجي منين ، و علي أد ما حسن كان "الرجل الجليدي" الذي لا يطرف له رمش في أحلك المواقف كنت أنا إنسان "حار" صيفاً و "ممطر جداً " شتاءاً !

بمعني إن عندي الهزار هزار و اللعب لعب ، أمّا الجدّ بأه فهو جدّ جداً جداً لحد الغلاسه و العصبيه و ممكن قله الأدب ..........مع الأسف !

يعني وقت اللمبه الحمرا ما تولع يالا السلامه !

و كل دا كان ليه أثر كبير في تقاربنا أنا و حسن

يعني تجاذب بين ضدين بنواحي كتير بالشخصيه و أيضاً تكامل بين نواحي أخري

كنت أنا عايز "أكتشف" حسن و هوا عايز يكتشفني من ناحيه ، و من ناحيه تانيه إنجذبنا لبعض في الهوايات المشتركه زي دراسه الشخصيات و الصرمحه و السهر و الطاوله !

لكن طبعاً مع حسن كان صديقي "المعيد" لأولي مدني سامر و سهرات ما بعد الثانيه صباحاً و إللي كانت بتنقني جوتاني خالص

و سامح صديقي زير النساء كانت فعلاً أيامه منفجره من الحريم و الفسح و الرحلات والضحك

و بالرغم من وجود شله الكليه اللذيذه جداً حسام الماكينه الألمانيه و حسين الأرستقراطي و حشيش قنبله الضحك و خفه الدم الموقوته و الخروج و لعب الإستيماشن يظل حسن هو العلامه الفارقه في تانيه مدني لأن الإنسان إللي يقترب من قلبك يكون له ذكري لا تُنسي !

كان خروجي مع حسن منفرداً علامه هامه جداً علي إننا أصبحنا أصدقاء بالفعل !

و دي علامه مهمه جداً في الصداقه علي فكره ، يعني ممكن تعرف واحدو إتنين و تلاته و عشره ، لكن تأكدّ إن صديقك أو صديقتك بجد هوا الشخص إللي تقدر تخرج معاه أو معاها منفردين

يعني أنا أقدر أخرج مع سامح أو سامر أو حسام أو علاء أو سيد منفرداً

لكن مقدرش أخرج منفرداً مع حشيش أو حسين أو أحمد جاد

بالرغم من إن كلهم إصحابي ، لكن الخروج منفرداً "فلتر" هام جداً يحدد مدي قرب صديقك منك

المهم إن حسن كان شخصيه غريبه عليا ونا غريب عليه

و كانت لقاءتنا لها نكهه و طعم خاص جداُ من تلاقي الفكر و التجارب الشخصيه و التخطيط و الدخول في مغامرات جديده و جريئه و جميله !

لدرجه إني مره "طنشت" بت زي القمر كلمتني في التليفون (ماكنش فيه موبيل طبعاً) و قالتلي أشوفك دلوقت.................عشان كنت بلبس و نازل لحسن .....شوفتوا الهبل!!

ياعم وجعت دماغنا

مايو 15, 2008 ، 10:32 م .. من قبل Anonymous

حسن حسن حسن

سميها مدونة حسن وحنان
لاحظ انك بتكتب مذاكرات حسن مش مذكرات مهندس فاشل .. و بعدين فشل ايه وجعت دماغنا بفشلك .. مفيش ف حياتك نجاح تقوم تقرفنا .. كفاية احبطنا حرام عليك

اوعه تزعل

مايو 15, 2008 ، 10:35 م .. من قبل Anonymous

الصراحه ما تزعلش
غير شويه
خليك عاقل
و اوعه تكون منفعل
سلام يا حزومه

اخوك نداء الحق

رأى فيك بصراحه

يونيو 25, 2008 ، 03:42 ص .. من قبل marwa

انت انسان صريح ودى حاجة اشجعها فيك وخاصة لما اتكلمت عن الصراحه مع النفس بس انت فشلم دة اللى انت وضعة فى عنوانك ووصفك لنفسك انك فاشل جاء من كتر ما شفت حكايات ومريت بيها واستهترت بيها لانك اكيد بتقول انا شاب وكلهم بيعملوا كدة لكن انت انسان مستهتر شوية ومش فاضى الا للمذكرات الفاشلشة اللى قاعد تكتبها واللى انا قرأتها بالصدفة خلى عندك هواية مفيدة احسن استثمر فيها وقتك حاول تصارح نفسك فعلا وتصلح من نفسك اللى مش عجبك فى شخصيتك حاول تغيرة "وأسعى يا عبد وانا اسعى معاك"000 معلش طولت عليك0000سلاااااااااااام

أرسل تعليق

من:

*

عضو مسجل: [ دخول / التسجيل ]

* عنوان الموقع:

* البريد الإلكتروني:
الموضوع:

* النص:

* الرمز: